Edukimi si detyrë fisnike i një shoqërie të përgjegjshme

Edukimi si detyrë fisnike i një shoqërie të përgjegjshme

Të flasësh për edukimin si sistem më vete do të thotë t’ia delegosh këtë detyrë fisnike një hallke të vetme të shoqërisë, në një kohë kur procesi i edukimit fillon që në gjirin e familjes.

Gjendemi përpara një shoqërie që si thotë Bauman “e luhatshme” por në të njëjtën kohë shoqëri e themeluar mbi një sërë vlerash duke filluar nga: familja, shkolla dhe shoqëria.

Cilat janë sfidat e  sotme të edukimit?

Të gjesh sfidat e sotme do të thotë ta konsiderosh edukimin si proces gjithpërfshirës duke prekur aspektet njerëzore si ai:

-       intelektual

-       psikologjik

-       professional

Këta janë bazat e para të një politike të re për një shoqëri largpamëse.

Për të përballuar sfidat e sotme duhet të rrënjosen fort vlerat edukuese që i gjejmë në familje, shkollë dhe shoqëri. Bashkëpunimi i harmonishëm i këtyre tre sferave njerëzore bashkëndan vlerat ndërmjet tyre. Në të njëjtën kohë ruhet elasticiteti i një gatishmërie ndryshimi përsa i përket mënyrës së rrënjosjeve së vlerave. “Luhatshmëria” të cilën e përmend dhe filozofi bashkëkohor Bauman, nuk duhet të trondisë vlerat por t’i përshtatet një shoqërie gjithnjë e në ndryshim përsa i përket anës instrumentale të jashtme.

Sfidat e sotme na shtyjnë të reflektojmë për rëndësinë themelore të vlerave, të vëmë në diskutim format e jashtme që i përbëjnë ata, në mënyrë që të mos përputhen bashkë modernizimi dhe çrrënjosja e vlerave.

Detyra urgjente e edukimit të brezave të rinj nxit t’i vëmë rëndësi koordinimit mes familjes-shkollës-shoqërisë.

Sot po ndeshemi me prindër që ia delegojnë detyrën që duhet të mbartin për edukimin e fëmijëve të tyre, strukturave shkollore, ku krijohet një hendek i pakapërcyeshëm mes këtyre dy sistemeve. Gjendemi përballë dy strukturave që nuk ecin paralele për gjithpërfshirjen edukative të fëmijëve.

Gjithashtu mund të egzistojnë dhe struktura shkollore që përgjigjen vetëm për kalimin apo transmetimin e dijeve. Ndoshta nuk prekin në asnjë mënyrë aspektet e tjera të personalitetit në formimin e fëmijës. Në këtë dinamizëm shkolla është ndërmjetëse mes familjes dhe shoqërisë apo thjesht qëndron në kufij mes tyre?

Nga sa u tha mësipër vëmë re se shkolla ka një rol themelor në politikat sociale; roli themelor që shkolla ka në këtë mes kërkon domosdoshmërisht që mos të ketë pozicion vartës përsa i përket politikës por bëhet fanar ndriçues bashkëpunimi dhe përgjegjësimi për të gjetur së bashku ura bashkimi mes familjes dhe shoqërisë.

Si mund të realizohet kjo gjë?

Është shumë i rëndësishëm formimi i duhur professional, i ekspertëve, që të jenë të aftë të bëjnë analiza objektive të gjendjes së shkollës dhe koordinimin mes shkollës dhe tregut të punës. Për të zvogëluar sa më shumë të jetë e mundur papunësinë, të planifikohet në mënyrë të përshtatshme sistemi arsimor pa lënë mënjanë respektimin dhe zhvillimin e prirjeve personale të brezave të rinj.

Strukturat e arsimit duhet të kenë shikim largpamës që lejojnë zhvillimin e tregut të punës dhe hapjen e mundësive të reja të zhvillimit. Edukimi nuk duhet të pësojë “black out” përsa i përket zhvillimit personal dhe profesional por dijet që merren të kenë një shteg shprese ku mundëson secilin student të dijë dhe të planifikojë, të projektohet drejt së ardhmes.

Bëhet fjalë të formohet një mentalitet veprimi ku të ndërgjegjësohet çdo nxënës që të ecë përpara jo vetëm përsa i përket dijeve që shkolla perhap por të jenë ata vetë kërkues të vazhdueshëm për përparimin e hulumtimit shkencor.

Për ta bërë sa më të realizueshëm nga sa u përmend deri tani, bëhet i nevojshëm pranimi në hallkat e ndryshme të shoqërisë nëpërmjet konkurrimit, intervistimit dhe mundësisht e një periudhe sado e shkurtër prove ku secili person mat veten përballë profesioneve të ndryshme me të cilët ushtrohet.

Dëshmi e realizimit të gjithpërfshirjes personale dhe profesionale janë dhe strukturat e ndryshme private apo shtetërore që janë hapur në qarkun e Lezhës. Përfshirë këtu pothuajse të gjitha fushat dhe hapjen e shumë kurseve apo shkollave profesionale.

Vendi strategjik në të cilën gjendet qyteti i Lezhës ofron mundësinë e orientimit të planit edukativ drejt zhvillimit turistik të këtij qyteti.

Duhet të përmendet ndryshimi kolosal që vendi ka pësuar, mundësimi i zhvillimit të sistemit informatik veçanërisht në strukturat shkollore. Nxënësi gjendet përballë një bote të tërë që ofron  plot mundësi komunikimi, hulumtimi dhe studimi.